सरिता कठायत
चैत्र १९ डोटी ,
डोटी — माध्यमिक शिक्षा परीक्षा (एसइई) आजदेखि देशभर सुरु भएको छ। डोटी जिल्लामा भने यस वर्ष कुल ३ हजार १ सय ८२ जना विद्यार्थी परीक्षामा सहभागी भएका छन्। शिक्षा विकास तथा समन्वय इकाइ डोटीका प्रमुख भिम प्रसाद पनेरूका अनुसार नियमिततर्फ २ हजार ३८० जना विद्यार्थी सहभागी छन्, जसमा १ हजार २०५ छात्र र १ हजार १७५ छात्रा रहेका छन्। यस्तै, ग्रेडवृद्धि (पूरक) तर्फ ८०२ जना विद्यार्थी सहभागी छन्, जसमा २५६ छात्र र ५४६ छात्रा रहेका छन्। जिल्लामा कुल सहभागीमध्ये १ हजार ४६१ छात्र र १ हजार ७१८ छात्रा रहेका छन्। एसइई परीक्षा सञ्चालनका लागि डोटीमा १३ स्थानमा १५ वटा परीक्षा केन्द्र तोकिएका छन्। परीक्षा शान्तिपूर्ण, व्यवस्थित र मर्यादित बनाउन आवश्यक सुरक्षा तथा व्यवस्थापकीय तयारी पूरा गरिएको पनेरुले जनाएका छन्। यस वर्षको एसइई परीक्षा विहान ८ बजेदेखि सुरू भएर ११ बजेसम्म सञ्चालन हुने भएको छ ।परिक्षाको पहिलो दिन आज अनिवार्य अङ्ग्रेजी विषयको परीक्षा सञ्चालन हुनेछ । जिल्लाभरका परीक्षा केन्द्रहरूमा विद्यार्थीहरू उत्साहपूर्वक सहभागी भइरहेका छन् ।
