डोटी, १२ चैत/डोटीमा भालुको आक्रमणबाट श्रीमान श्रीमती घाइते भएका छन् । भालुको आक्रमणबाट जिल्लाको सायल गाउँपालिका–६, स्वाडाका अन्दाजी ६२ वर्षीय करी साउँद र ६० वर्षीय दुर्का साउँद घाइते भएको वडा अध्यक्ष दीपकबहादुर साउँदले बताए । गाउँबाट करिव एक घण्टाको दूरीमा रहेको सौडीखेतस्थित खर्कमा गएराति उनीहरुलाई भालुले आक्रमण गरेको स्थानीय पञ्जुके साउँदले बताए । ‘घटना हिजो भएको हो । त्यहाँ कोही थिएनन्’ पञ्जुके साउँदले भने, ‘गाई गोरु हेरचाहका लागि आज बिहान छिमेकी गएपछि साउँद दम्पती घाइते अवस्थामा फेला परेका हुन् ।’ घाइतेको अनुहार र शरीरमा घाउ लागेको छ । घाइतेहरुलाई उपचारका लागि सिलगढी ल्याउदै गरेको स्थानीयले जानकारी दिएका छन् ।