डडेल्धुरा : डडेल्धुराको परशुराम नगरपालिका–६ तातापानी माइतीघर भएका रोहिता कठायत, दुरा थापा र मानमती कार्कीले आफ्नी आमाको किरिया गरेर पितृसत्तात्मक सोचमा चुनौती प्रस्तुत गरेका छन्।
उनीहरूका ७९ वर्षीय बुबा खड्कसिंह अपाङ्गता भएका व्यक्ति हुन् भने परिवारमा दाजुभाइ छैनन्। आमा राधादेवी खड्काको मृत्युपछि तीन दिदीबहिनीले किरिया गरेर छोरीहरू पनि छोरा सरह हुनसक्छन् भन्ने सन्देश दिएका छन्।
चार दिदीबहिनीमध्ये जेठी बिर्मा बडूवाल महिनावारी भएका कारण किरियामा बस्न नसकेकी हुन्। आमाले मृत्युअघि नै छोरीहरूले किरिया गरिदिन अनुरोध गरेकाले उनीहरू तयार भएका थिए।
हिन्दू परम्परामा छोरा वा पुरुष मान्छेहरूले मात्रै किरिया गर्ने चलन भए पनि पछिल्लो समय महिलाहरूले पनि किरिया गर्ने परिपाटी बढ्दै गएको छ। यस घटनाले समाजमा नयाँ चेतना फैलाउने विश्वास गरिएको छ। उनीहरू पाँच दिनदेखि आमाको किरिया गरेर बसेका छन्। उनीहरूकी आमा राधादेबी खड्काको १ चैतमा मृत्यु भएपछि उनीहरु किरिया बसेका हुन्।
