गणेश बहादुर मौनी
माघ २६ डोटी
डोटीमा प्रमुख जिल्ला अधिकारी मोहनराज जोशीले अपाङ्गता भएका व्यक्तिहरूलाई घरमै पुगेर नेपाली नागरिकताको प्रमाण पत्र उपलब्ध गराएका छन् ।
जिल्लाको बोगटान फुड्सिल गाउँपालिका अन्तरगत वडा नम्बर ५ उपल्ला गाउँका सुरेश बोहरा र वडा नम्बर ७ ओजेलीका निर्मल धामीलाई प्रजिअ जोशीले आफै घरमै पुगेर नागरिकता उपलब्ध गराएका हुन् ।
शारीरिक रूपमा पूर्ण अशक्त भएका कारण नागरिकता लिन प्रशासन कार्यालय सम्म आउन नसक्नेहरूको सहजताका लागि घरमै गएर नेपाली नागरिकता प्रदान गरेको प्रजिअ जोशीले बताए । उनले भने, “हामीले एक जना मानसिक तथा शारीरिक र एक जना शारीरिक रूपमा अशक्त भएका व्यक्तिलाई नागरिकता उपलब्ध गराएका छौ । उहाँहरूले पहिला बालक परिचयपत्रबाट सामाजिक सुरक्षा भत्ता पाइरहनु भएको रहेछ, अहिले नागरिकता पाउने उमेर भएको तर कार्यालयमा पुगेर नागरिकता लिन समस्या हुने भएपछि घरमै नागरिकता उपलब्ध गराएका हौँ ।
राज्यबाट पाउनुपर्ने सेवा सुविधाबाट कुनै पनि नागरिक कुनै कारणले वञ्चित हुन नपरोस् भन्ने उद्देश्यका साथ उनीहरूको शारीरिक र आर्थिक समस्यालाई मध्यनजर गरी घरमै नागरिकता दिइएको प्रजिअ जोशीले बताए । जिल्लाका अन्य स्थानीय तहहरूमा पनि कोही यस्ता व्यक्तिहरू छन् जो प्रशासन कार्यालय सम्म आउन सक्ने अवस्थाका छैनन् जानकारी पाएमा घरमै गएर नागरिकता उपलब्ध गराउन सकिने समेत प्रजिअ जोशीले बताए ।
गाउँपालिकाको सहजिकरणमा वडाबाट कागजात बनाएर प्रशासन कार्यालयमा आवश्यक प्रक्रिया पुरा गरेर घरमै नागरिकता उपलब्ध गराइएको गाउँपालिकाका अध्यक्ष कमल बहादुर गड्सिलाले बताए । नागरिकता बनाउने उमेर पुगेका तर नागरिकता नभएकै कारण सामाजिक सुरक्षा भत्ता रोकिने अवस्था आएपछि प्रशासनसँग सहजीकरण गरिएको अध्यक्ष गड्सिलाले बताए ।